麦总颁奖礼被嘘 老佛爷当佢透明

xcy232323

       

        金球奖荣誉尽在西甲，有「主场之利」嘅基利安麦巴比却有另一番遭遇，佢先喺红地毯期间被球迷嘘爆，入到会场内与皇马会长皮里兹同场，再被对方无视当透明，公布结果时镜头影到呢位「球坛巨婴」黑面，相当尴尬。
        过去半年麦巴比都被负面新闻包围，先系放皇马飞机同巴黎圣日耳门续约，掌管球队大权，因此被封为「麦总」，然後又同尼马争射12码，继而爆发内讧，得罪埋美斯，近期再传出有意明年1月离队，虽然佢上场赢马赛後已澄清传言，表示自己会留队，但球迷眼睛雪亮，对佢嘅好感亦告消失。
        当麦巴比同父亲现身会场嘅红地毯，现场传来不少嘘声，麦总走到中央留影，然後离开。最终麦总在金球奖排名第6，未能进入三甲，镜头影到佢面露不快表情，虽然佢已在社交网向宾施马送上祝贺，但都掩饰唔到佢嘅唔开心。
        呢晚麦总同皇马会长「老佛爷」皮里兹同场，现场报道两人并无交流，「老佛爷」不但无视对方，同记者讲起麦巴比时仲话：「我根本冇去睇佢，我哋有一个好好嘅夏天，再讲已经冇意义，现时我哋嘅锋线进步惊人，拥有洛迪高高斯同云尼斯奥斯祖利亚两位巨星。」记者仲问到艾宁夏兰特2024年嘅解约条款，「老佛爷」则大耍太极表示冇留意。