宾施马眼镜Look夺金球奖 西甲球星玩晒

xcy232323

       

        金球奖颁奖礼周二(18日)凌晨喺巴黎举行，法国前锋宾施马以大热姿态，喺「主场」力压沙迪奥文尼同奇云迪布尼，首度赢得金球奖。呢位34岁球星以金丝眼镜Look造型出现，喺上一位法国籍金球奖得主施丹手上接过奖座，成为法国史上第5个拎到金球奖嘅球员，名留青史。
        宾施马上季带领皇家马德里勇夺欧联同西甲冠军，亦协助法国夺得欧国联冠军，球会同国家队合共56场比赛狂入50球，无论个人定系团队表现都超卓，攞奖实至名归。宾施马系法国史上第5位得奖球员，之前4个分别系哥柏、柏天尼、柏宾同施丹，有意思嘅系，大会今次安排98年金球奖得主施丹为宾施马颁奖，大有传承味道。
        以文青「眼镜Look」出席嘅宾施马表示：「呢个奖系我由细到大嘅梦想，通过多年努力终於实现，离开法国国家队嘅日子非常难过，但我从未放弃，我对自己一直所做嘅事非常满意。」宾施马更表示现场嘅施丹同朗拿度一直系佢嘅模范球员，最後更邀请埋妈妈同囝囝一齐上台分享呢个光辉时刻。
        除宾施马赢金球奖之外，佢嘅皇马队友泰拔高图尔斯亦夺得「耶辛奖」(最佳门奖)，巴塞隆拿同样收获丰富，新星加维赢得「哥柏奖」(最佳新人)、女足球星佩迪拉丝获得女子金球奖、罗拔利云度夫斯基拎到「梅拿奖」(最佳射手)，西甲双雄横扫颁奖礼各大奖项。
        金球奖Top10
        1 宾施马
        2 沙迪奥文尼
        3 奇云迪布尼
        4 罗拔利云度夫斯基
        5 穆罕默德沙拿
        6 基利安麦巴比
        7 泰拔高图尔斯
        8 云尼斯奥斯祖利亚
        9 莫迪历
        10 艾宁夏兰特