C朗迎审判日 会晤坦哈格决定曼联前途

xcy232323

       

        C朗拿度早前因拒绝上阵兼提早离场，被曼联判停赛同禁操处分，呢位葡萄牙球星周二(25日)解禁即迎「审判日」，据报将重返卡宁顿训练基地同领队坦哈格会面，希望解决今次纷争。消息指坦哈格要C朗就事件道歉，并承诺会遵守球会定下嘅纪律，先会容许佢再次上阵，而关於1月转会嘅话题亦可能系会议内容之一。
        C朗喺上星期对热刺完场前「一走了之」，事後被罚对车路士一仗停赛，并禁止同一队操练，有关禁令喺周日(23日)完结，由於星期一(24日)系休息日，所以C朗周二会正式解禁回归，并会喺罢踢事件後首次同坦哈格见面「摊牌」。坦哈格日前表明「C朗仍系计划一部份」，但消息指前提系C朗要正式向佢道歉，并承诺之後会遵守纪律。
        坦哈格日前表示：「C朗嘅足球成就非常辉煌，但佢要明白，顶级赛事嘅关键系『当下』，所有人都会因『当下』嘅行为受到批判，而唔系年龄或者名气。」C朗喺事件後亦曾喺社交网发文解释，但并冇作出道歉，如果双方喺今次会面能够冰释前嫌，C朗有望喺周五(28日)凌晨欧霸盃对舒列夫一仗复出。
        除咗短期嘅上阵问题外，1月转会亦可能系会面议题之一，早前有报道指坦哈格打算1月放走C朗，另外物色新前锋，而C朗希望离队亦系公开秘密，消息指车路士班主保利对佢仍非常赏识，有可能会出手斟介，而意甲劲旅拿玻里亦系潜在买家之一。