阿仙奴600万镑卖中坚 阿迪达第1收购离队

xcy232323

       

        阿迪达喺2019年12月上任做阿仙奴领队，时隔3年几球队面目全非，今个夏天准备重金招兵下，同样亦要「放血」，阿迪达当年上任第1个收购柏保维拿，日前正式加盟意甲球会蒙沙，呢位西班牙中坚亦公开感人告别信，同阿仙奴球迷讲再见。
        阿迪达喺2020年1月转会窗，以先借後买方式向法林明高签入柏保维拿，虽然大部份时间都系後备，只为阿仙奴踢过22场赛事，上2季分别外借乌甸尼斯同蒙沙，但上季出色表现帮蒙沙护级成功後，蒙沙决定用600万镑(约6,000万港元)将佢买断。
        29岁嘅柏保维拿上季外借期间几乎丧命，上年10月米兰商场造成1死4伤嘅斩人案，佢就被斩伤背脊，好在经治疗後可以复出比赛，当时阿仙奴球员亦喺比赛中拎起佢件波衫「越洋祝福」。柏保维拿落实转会後表示：「好感激阿仙奴畀我机会，能够披起呢间球会嘅战衣系一大荣幸，阿仙奴永远会喺我心入面占重要位置。 」