云格回归任酋长盃嘉宾 为铜像揭幕

xcy232323

       

        阿仙奴周四(3日)凌晨举行酋长盃赛事，呢项2007年首次举办嘅比赛，每年都系「兵工厂」季前重要热身环节，不过今届再多添一层意义，因为前领队云格将获邀「返屋企」任嘉宾，并为新建嘅云格铜像亲自揭幕。
        酋长球场外有亨利、柏金同阿当斯3位传奇铜像，唔少球迷都希望球会为执教22年嘅云格造一个铜像，阿仙奴亦顺应民意，聘请多次获奖嘅雕塑家Jim Guy制作，铜像系以云格高举英超冠军奖盃嘅经典动作为蓝本，成个铜像高3.5米。阿仙奴领队阿迪达表示：「云格绝对值得得到呢个荣耀，依家佢真正喺阿仙奴永垂不朽，好庆幸曾经跟云格踢波，系佢签我嚟阿仙奴、系佢委任我做队长，呢啲都系我永远唔会忘记嘅事。」
        阿仙奴证实云格将会喺酋长盃担任嘉宾，并亲自为铜像正式揭幕，更特别嘅系，阿仙奴今场对手摩纳哥，亦系云格曾经执教7年嘅球会，令呢场酋长盃更加似一场「云格纪念赛」。