未踢已伤 贺兰特无缘首2场英超

xcy232323

       

        曼联周六(5日)晚正式宣布签入阿特兰大射手贺兰特，但同时亦爆出不利消息，根据英国《太阳报》报道，呢位20岁丹麦国脚有伤在身，将会缺阵曼联首2场英超对狼队、热刺，估计贺兰特最快都要等到8月26日晚主场对诺定咸森林，先至有机会披甲。
        曼联喺热身赛对朗斯开波前，公布贺兰特加盟，佢亦入场接受球迷欢呼，并拎住波衫影相，但会方仲未确定佢会着边个号码。当红魔鬼球迷兴高采烈等睇贺兰特表演时，原来佢早前跟随阿特兰大操练期间，不幸受伤，虽然伤势唔严重，但仍然需要时间治疗及操起状态，基本上首2场英超都唔使预佢。不过，并无损贺兰特成「魔」兴奋心情，佢话自细已经系曼联球迷，以红魔鬼球员身份行入奥脱福球场，终於梦想成真。
        贺兰特养伤之下，预料曼联主帅坦哈格季初赛事，会将踢惯左翼嘅拉舒福特推前出任正前锋，阿历真度加拿祖有望成为正选左翼，呢位19岁阿根廷国脚喺热身赛对朗斯，表现出色，并贡献1次助攻，获曼联球迷选为今场最佳球员，新一季表现值得令人期待。