倒戈热刺必搏 迷你美斯望返英超

xcy232323

       

        由於英超竞争激烈，唔少本土年轻球员为咗争取上阵机会，被迫选择外流，查顿辛祖、祖迪比宁咸等英格兰小将都喺国外成名，而士砵亭新星马卡斯艾活士唔单止同样来自英国，更加系热刺弃将，今仗誓要打争气波。
        23岁嘅马卡斯艾活士可打进攻中场、翼锋及装「假9」，查实佢系热刺青训产品，但从未为呢支北伦敦劲旅打过英超，仲不断被外借，直到2019年加盟葡超球队甘马雷斯，先至结束人球生涯。
        马卡斯艾活士喺甘马雷斯打出名堂後，於今年1月676万欧元改投士砵亭，续有佳作，今届欧联已经开斋兼交出2个助攻，首循环主场赢热刺2比0，凭住出色盘扭玩对手後防氹氹转，由於身高只得1米68，甚至被传媒称为「迷你美斯」，周四凌晨欧联再斗母会一定搏尽，博返英超搵食。