【东体争议】4大「即食」名帅 边位救到车仔？

xcy232323

       

        车路士季初换帅之後，成绩不进反退，现时英超仅排第10位，并刚於英足盃第3圈惨吞曼城4蛋，领队朴达开始闻到鱿鱼香，车仔名宿拿保夫亦呼吁炒呢位47岁少帅，以新老板保利嘅急进作风，随时又手起刀落再炒领队。不过，仲有边位猛人能够立即接手，拯救到车路士呢？环顾现时闲赋在家嘅冠军级名帅，不外乎普捷天奴、施丹、勒夫、宾尼迪斯。
        当中普捷天奴属於大热，呢位阿根廷教头曾於英超搵食多年，执教热刺期间成绩有目共睹，包括领军打入欧联决赛，而且住过伦敦，熟悉环境亦对车仔有一定了解，可以立即上手。事实上，「肥普」担任巴黎圣日耳门期间，过得唔开心，早已想重返英超，更何况现时自由身，若然朴达被炒，普帅无疑系最佳「即食」领队人选。
        其次系宾尼迪斯，呢位62岁西班牙名帅系英超老江湖，执教过利物浦、纽卡素、爱华顿，经验同教波能力唔需要怀疑，最重要系曾於2012年11月至2013年5月做过车路士看守领队，领军夺得欧霸盃冠军，有往绩支持，相信可以获得保利信任。
        另外，法国打入世界盃决赛後，领队迪甘斯已获续约至2026年，令一直想接手担任法国主帅嘅施丹美梦成空，预料会改变主意，重新接受豪门球会邀请，车仔财力雄厚，可以利诱呢位曾执教皇马2次捧西甲及3次欧联冠军嘅金牌名帅加盟。
        最後前德国国队勒夫亦系唔错人选，话晒赢过世界盃及洲际国家盃冠军，以佢嘅级数应该有能力协助车仔重振雄风。