坦哈格出招逼走马古尼 极具侮辱性

xcy232323

       

        曼联一直有意出售中坚哈利马古尼，但呢位30岁英格兰国脚坐拥20万镑(约200万港元)周薪，深知一旦转会难以再获得高薪合约，所以赖死唔走。根据英国《太阳报》爆料，红魔鬼主帅坦哈格打算新一季褫夺马古尼队长臂章，逼佢离队。
        哈利马古尼上季英超仅8次担任正选，但名义上仍然系队长，佢坐冷板嘅时候多数由般奴费南迪斯担任队长，并且表现出优秀领导能力，令坦哈格感到满意。英国《太阳报》指坦哈格将於未来一星期内宣布，般奴费南迪斯正式成为新队长。
        除咗「强硬手腕」之後，坦哈格亦准备发「软功」，将会同哈利马古尼进行深入会谈，商讨佢去留问题，据悉曼联方面为咗说服马古尼离队，甚至愿意向佢支付一笔「遣散费」，补偿佢转会之後嘅人工损失。
        哈利马古尼现时仲有2年合约在身，虽然曾经传出热刺、巴黎圣日耳门有兴趣签佢，但之後都冇下文，恐怕就算马古尼愿意走人，都未必有球会肯收留佢。