【官宣】奥拿拿加盟曼联：一生努力为呢刻！

xcy232323

       

        曼联新门将人选终於落实，「红魔鬼」周五(21日)官方宣布，喀麦隆国脚奥拿拿由国际米兰加盟，双方签约5年，据报转会费为4,700万镑(约4.72亿港元)，成为史上第3贵价门将。奥拿拿加盟後即大卖口乖：「加盟曼联系无上光荣，我一生努力就系为呢一刻！」
        现年27岁嘅奥拿拿系「用波型」门将，亦系曼联领队坦哈格控球战术需要嘅特质，所以不惜工本都要搵佢取代迪基亚，将会着24号波衫嘅奥拿拿签约後表示：「加盟曼联系无上光荣，我一生努力就系为呢一刻！行出奥脱福球场守护大门、贡献球队会系另一神奇经历，曼联历史上有好多伟大门将，我会倾尽全力去写自己嘅传奇，好兴奋可以再次同坦哈格合作。」
        奥拿拿成为阿列沙巴拿加同艾利臣比加後，史上第3高转会费门将，佢会即时飞去美国同正喺当地集训嘅大军会合，最快会喺周日(23日)凌晨对阿仙奴嘅热身赛上阵。