车路士赢白礼顿止血 芝维尔又受伤

xcy232323

       


        今季表现低迷嘅车路士，周四(28日)喺英联盃第3圈主场1比0击败白礼顿，终止连续3场冇波入嘅颓势。不过车路士今场又有主力受伤，芝维尔喺比赛尾段伤出，随时又要抖几个星期。
        车路士今场用梅迪历、尼高拉斯积逊同高尔彭马做三叉戟，虽然形势上唔及白礼顿，不过胜在防守稳阵，更喺51分钟由尼高拉斯积逊一箭定江山赢波，晋级16强後抽中主场对布力般流浪。
        不过，满营伤兵嘅车路士今仗再添十字兵，左闸芝维尔喺比赛末段用晒换人时段後受伤，令车路士要以10人完成赛事，领队普捷天奴赛後证实：「芝维尔的确受伤，我哋要帮佢再做检查，相信系大腿筋问题。」
        芝维尔上季已经2次因为大腿受伤而休战，今次如果证实旧患复发，相信至少要休战几个星期，而车路士本身已有尼干古、列斯占士、韦斯利科芬拿、罗美奥拉维亚等10名伤兵。